5 ఎకరాల వరకే రైతుబంధు.. అది కూడా సీజన్ చివర్లో.. కొత్త విధివిధానాలు ఇవేనా..?

• Rythu Bandhu Latest News: రైతుబంధు పథకానికి సంబంధించి రేవంత్ రెడ్డి ప్రభుత్వం కొత్త విధివిధానాలు తయారు చేసే పనిలో నిమగ్నమైంది. గత ప్రభుత్వం హయాంలో రైతుబంధు పేరుతో చాలా వరకు డబ్బులు వృథా అయ్యాయని.. ఈసారి అలా కాకుండా అర్హులైన రైతులకు మాత్రమే అందేలా చర్యలు తీసుకుంటోంది. ఈ మేరకు.. 5 ఎకరాల వరకే రైతుబంధు ఇవ్వాలని ప్రభుత్వం యోచిస్తున్నట్టు తెలుస్తోంది. అది కూడా సీజన్ మొదట్లో కాకుండా చివర్లో ఇవ్వాలని ఆలోచిస్తున్నట్టు సమాచారం.

• Rythu Bandhu Limitations: సంచలన నిర్ణయాలతో పాలన సాగిస్తోన్న రేవంత్ రెడ్డి సర్కార్.. రైతు బంధు విషయంలోనూ కీలక నిర్ణయం తీసుకుంటున్నట్టు తెలుస్తోంది. గత ప్రభుత్వంలో చెట్లు పుట్టలు, రోడ్లు, గుట్టలకు, పెద్ద పెద్ద భూస్వాములకు రైతుబంధు డబ్బులు ఇచ్చారని తీవ్ర స్థాయిలో విమర్శలు గుప్పించిన కాంగ్రెస్ ప్రభుత్వం.. రైతు భరోసా కోసం కఠినమైన విధివిధానాలు రూపించే పనిలో నిమగ్నమైంది. కాంగ్రెస్ ప్రభుత్వ హయాంలో అర్హులైన నిరుపేదలకే పథకాలు అందాలన్న లక్ష్యంతో ముందుకెళ్తున్న రేవంత్ రెడ్డి సర్కార్.. రైతు బంధు పెట్టుబడి విషయంలోనూ అదే టార్గెట్ పెట్టుకుంది. ముందు నుంచి రైతుబంధును ఐదెకరాలకు పరిమితి విధించాలన్న ఆలోచనలో ఉన్న ప్రభుత్వం.. ఆ మేరకే విధివిధానాలు రూపొందిస్తున్నట్టు తెలుస్తోంది.

రైతు భరోసాకు 5 ఎకరాల పరిమితి విధించనున్నట్టు వార్తలు ప్రచారమవుతున్న నేపథ్యంలో.. మంత్రి పొంగులేటి శ్రీనివాస్ రెడ్డి చేసిన వ్యాఖ్యలు వాటికి బలం చేకూరుస్తున్నాయి. దీంతో.. కేవలం 5 ఎకరాల స్థలం ఉన్నవారికే.. అది కూడా సాగు చేసే స్థలానికి మాత్రమే ఇవ్వాలని విధివిధానాలు తయారు చేస్తున్నట్టు సమాచారం. అది కూడా.. వ్యవసాయ పనులు మొదలయ్యే ముందు కాకుండా సీజన్ చివరలో పంట సాయం అందించే ఆలోచన చేస్తున్నట్టు తెలుస్తోంది.ఇదిలా ఉంటే.. ఇప్పటికే ఐదు ఎకరాల వరకు రైతుబంధు నగదును అన్నదాతల అకౌంట్లలో ప్రభుత్వం.. దశలవారిగా ఇప్పటికే జమ చేసింది. కాగా.. ప్రస్తుతం ఎన్నికల కోడ్ నడుస్తుండగా.. ఎలక్షన్లు పూర్తయిన వెంటనే రైతుబంధుకు సంబంధించిన కొత్త విధివిధానాలను ప్రభుత్వం ప్రకటించనున్నట్టు తెలుస్తోంది.